Planning Board Vice Chairman chuan, “Mizoram lo kaihruai tawhtuten an zir loh avangin hmana kan neih tawh tur kan la nei thei lo va, tunah hian Pu Lalduhoma kaihruaina hnuaiah bul kan tan thar chauh ang a ni. He sorkar hian kawng dik a zawh mek a, tuna kan hmalakna chin chauh atanga chhut pawhin mipuiten sorkar tha a nihzia an hre mek a.  Kum hnih chhung hian eiru ve duh chu ni se eiruk tur a tam tawh lutuk a, heti chung hian tumah hming hliau  awm lo va, kan minister-te kut a fai thiau mai hi an fakawm tak zet a ni. Kalphung thar mipui sorkar hi Mizoram tan a thlamuanthlak a, opposition party-te hian sorkar ve an duh a nih chuan mipui tan policy-te zuarin Chief Minister tur te pawh zuar ngam ve rawh se,” a ti.

Dr. Kenneth Chawngliana chuan, “Independence ram kan nih atangin kum 79 kan hmang tawh a, hemi chhung hian kum 54 Congress an sorkar tawh. Heti khawpa sorkarna chang rei tawh ni mah se ram tan thil ropui tak hnutchhiah an nei mang lo. Nehru & Gandhi family-ten sorkarna kum 34 an chang tawh a, Nehru chhungkaw rorelna hnuaiah India ram chu Economy-ah kan hnufual em em a, ram a retheih avangin thenawm ramte nena innghirnghona kar atangin J&K ram bung thenkhat pawh kan chan a ni. P.V. Narasimha Roa sorkar hnuaiah kan ziaawm chho va, Economic Reforms siamin Manmohan Singh sorkar hnuah nasa leh zualin India chuan hma a sawn ta a ni," a ti.

"Congress party mah ni se Nehru chhungkaw enkawl loh Congress sorkar chuan India ram rethei tak mai chu nasa takin a chawikang ta a. Hetiang hian mi chak tak pahnihin India kaihruai mah se Congress party chuan Nehru chhungkua atangin Rahul Gandhi bawk an zuar chhuak a, hei hi an tlak chhiatna chu a ni ta a ni. Lok Sabha inthlanpui lo awm leh pawh ni se, a hma aiin Congress hi an tlak hniam zel ka ring. Lok Sabha-ah seat 543 awmin BJP-in seat 240 an lak theih laiin INC chuan seat 99 chauh an la phak a, India ram state 28 leh UT 8-ah Congress-in state 3 chauhah sorkarna changin sorkar laipui lama an chet chhiat chuan state lamah nasa takin an tla hniam zel thin. Tunah phei chuan India hmarchhakah Congress sorkarna a awm tawh lo va, Mizoramah pawh inthlanpui kan neih hnuhnung berah chuan seat 1 chauh an chang pha tawh a ni," a ti bawk.

"Mizoramah ZPM kan sorkar ta a, kalphung thar sorkar hnuaiah Prime Minister Narendra Modi-an India tha tak leh chak taka a kaihruai ang main Pu Lalduhoma kaihruaina hnuaiah kum hnih chhung lekin hmel thar kan hmu a, hetiang zela kan kal chho a nih chuan India ram state danga party thenkhatten term tam tak sorkarna an chelh angin ZPM pawhin Mizoramah sorkarna kan chelh ngei ang” a ti.